周家蔚生7.7磅細仔 , 天明改名JT

現年31歲的人妻周家蔚三年抱兩，繼前年為老公洪天明誕下兒子洪大仁，昨日再剖腹生第二名兒子JT，BB仔重7.7磅，肥肥白白超可愛。昨日下午2時許，好友袁偉豪將BB仔相上載微博洩密，並留言恭賀：「恭喜周家蔚母子平安，洪天明你又多了一位車友！」相中的洪小B正在酣睡，張開小嘴伸脷萌爆！
不過，袁偉豪搶先天明夫婦公佈喜訊，事後他似乎知道自己多事了，在上載BB仔相10多分鐘之後，即時火速刪除這條微博。直至下午5時，天明終在微博貼B仔相公告喜訊：「Hi all！大家好！我是JT今天來到這個世界，請睇住細佬。」
洪金寶風趣回應

愛妻情切的天明更留言叮囑：「媽媽今天已經好累。請大家俾多啲時間佢休息，唔好騷擾佢啦。母子平安，大家請放心。好想快啲返屋企見哥哥。多謝大家的關心。Love You all.」他昨在電話說：「當然開心啦，最緊要BB好健康，媽咪又OK，樣樣都順利，佢又攰我又好攰，我又冇瞓過覺，今日唔會點出街，你哋唔使去醫院等啦，30號我會出席活動，到時再同大家傾啦。」
祖父洪金寶則在電話風趣地說：「BB今日出世，我唔喺香港，喺地球某一個角落，遲啲會返嚟唔使急。」他表示天明影了BB相給他看，問細孫仔似邊個？他說：「話佢似哥哥，重7.7磅，剖腹生嘅，因為哥哥都係開刀。」是否親自為細孫改名？他坦言：「我改咗，未知佢哋用唔用，暫時唔講得住，費事講咗佢老竇唔鍾意。」