Rain新片拍攝途中換導演 網民憂成第二部《Real》

【韓流】Rain新片拍攝途中換導演 網民憂成第二部《Real》

香港蘋果日報 | 2017-06-29



韓流天王Rain今年1月同拍拖多年嘅女星金泰希拉埋天窗，金泰希更於上月宣佈懷孕，估計金泰希會停工安胎，所以Rain就要Keep住開工賺奶粉錢。之前有報道指Rain為咗男星李凡秀首次擔任電影製作人嘅作品《嚴福童》，而辭演荷李活巨片、新一齣《變種特攻》（X-Men），而Rain為咗演繹日本殖民時期喺亞洲各大自行車賽事嘅傳奇運動英雄嚴福童呢個角色，開拍前更進行單車訓練。

製作費高達120億韓圜(約8,224萬港元)嘅《嚴福童》，韓國方面今日爆出換導演嘅消息，報道指原本負責編劇及導演嘅金佑成本月初表示希望離開製作方，及後製作方進入「諮詢導演」模式，最終由韓片《國家代表2》嘅導演金鐘鉉接手。據悉係因為金佑成導演及製作組發生意見衝突，最終放棄執導，製作方挽回未果。

對此，製作方就反駁係因為金佑成導演唔夠合作：「導演對於大投資製作感到好大壓力，我哋希望導演能夠與諸多經驗豐富嘅工作人員好好合作、拍完作品，但（導演）唔聽勸告、堅持己見，最終宣佈上周離開製作組。 」

不過亦有相關人士暗指製作方越權：「《嚴福童》今年4月尾開拍，計畫拍84場戲，喺拍完10場時製作方對成果唔滿意，要求加入劇本原來冇嘅內容，製作公司老闆李凡秀仲親身到現場指揮，但拍到第30場左右時，金佑成導演就唔再嚟片場。電影原定於8月煞科，依家已經延遲到9月。」

《嚴福童》更換導演一事令唔少粉絲及網民擔心對電影造成影響：「我未見過更換導演後會成功嘅電影」、「投資額咁大，一定係投資方指手劃腳喇，導演連劇本都寫好卻主動離開，可見有幾過份」、「Rain仲為咗《嚴福童》辭演《變種特攻》，好可惜」。而日前上映嘅《Real》亦喺拍攝途中換導演，未知係咪受影響，搞到電影由男神金秀賢孭飛都失口碑及票房，難怪有網民擔心《嚴福童》會有類似嘅下場。