【韓流】蘋果專訪！晉久險避開延坪海戰

【韓流】蘋果專訪！晉久險避開延坪海戰

蘋果日報 | 2015-09-27



（左起）金武烈、李玹雨、晉久主演嘅《延坪海戰》近日喺香港上映。


由李玹雨、晉久同金武烈主演、改編自真人真事嘅韓片《延坪海戰》近日喺香港上映，三位主角早前就接受本報訪問，分享拍攝辛酸史。


《延坪海戰》係講2002年6月29日，世界盃足球賽南韓對土耳其爭奪季軍當日，當南韓上下人民都為國家隊打氣時，北韓戰艦突然喺延坪島海域越過「北方界線」發動襲擊，跟南韓掀起激戰，造成6位海軍將士死亡，18人受傷嘅悲修故事。


發生《延坪海戰》當年，主角之一嘅李玹雨只得10歳，所以佢都坦言對事件冇咩認識，喺拍攝時都要花好多時間都做資料蒐集。而晉久就話：「喺我退役後第6日就發生延坪海戰，我當時亦都投入喺世界盃當中，諗起如果海戰比預期提早一星期發生，相信我都唔可以準時退役。」


對於要扮演海戰中的真實主角，三位主角都坦言有壓力，晉久：「要演繹殉職軍人，對佢哋嘅屋企人有過意唔去嘅心，始終自己唔可以活現角色。」李玹雨：「佢哋係為我哋而犧牲嘅勇士，我唔想因為自己嘅演出而連累當時人。」


由於電影有近九成場面都喺海上進行拍攝，最辛苦嘅莫過於要食暈浪丸抵抗暈船浪呢環，而李玹雨更表示：「炎炎夏日甲板上冇遮蔭嘅地方，所以拍攝時一直諗『太陽幾時落山？』而且好想食雪糕。」


而金武烈就話：「有時因為貪靚冇戴眼鏡拍攝，點知當海水打入眼嘅時間真係痛到好難開眼。」


雖然拍攝過程好辛苦，但金武烈同晉久都自爆有唔少趣事，當中最搞笑嘅就係當完兵嘅佢哋喺拍攝期間都有錯覺回到當兵時，金武烈：「拍攝時我都幾次誤以為自己喺軍中生活，因為拍攝場景好昔，而且當我着住海軍軍服時，有現役軍人向我敬禮，我都好欣然接受。O依家諗返都覺得自己有少少過分。」晉久：「因為我都係海軍出身，所以可以好好咁接受後輩嘅敬禮。」