演員跪地謝票 《復國者聯盟》等過千萬票房

李政宰、河正宇等人噚日喺謝票會上跪地鞠躬多謝影迷，更預祝新片《復國者聯盟》過千萬入場人次

由韓國女神全智賢主演嘅新片《復國者聯盟》自從上個月底喺韓國上畫之後，觀眾反應非常熱烈，去到今日為止，電影嘅總累積入場人次已經超過966萬，距離千萬入場人次只係差34萬，認真厲害。

其實以電影一直以嚟嘅入場人次成績，加上聽日就係韓國光復70周年紀念日，咁啱同《復國者聯盟》又係講韓國光復歷史，咁有共鳴，電影要喺聽日為止過千萬入場人次真係話都冇咁易。

而噚日兩大男主角李政宰同河正宇同其他演員、導演喺出席首爾謝票活動時，就率先勁有自信咁拉晒橫額同影迷預祝電影破千萬入場人次，佢哋仲跪地鞠躬多謝大家支持，可惜女主角準媽媽全智賢照舊缺席，令成個活動有少少失色。

另外，《復國者聯盟》早前就被韓國一個小說家指摘話電影故事內容係抄襲自己好多年前嘅一本小說，仲要求電影停播，對此導演日前喺接受電視訪問時，就話：「如果有抄襲起訴就好，作家一直以嚟都只係對傳媒講，但又唔真正咁企出嚟。」

应该很好看