【韓流】「韓國魯芬」李國珠公開化妝過程 最緊要食糖！

    公開素顏對韓國女星來講向來都是一個好艱難的任務，不過有「韓國魯芬」之稱的搞笑女星李國珠就非常大方，
先後在節目公開她素顏個樣，在前日播出的演出節目《我獨自生活》裡面，李國珠就公開自己在屋內的化妝過程，令其他男星都笑爆嘴。

    原本頹到爆、成副屋企look上陣的李國珠就先推出佢架「化妝品車」，唔知仲以為佢好專業添，
之後佢就同普通女仔一樣由護膚着手，正當大家等睇下一步時，李國珠就喺架「化妝品車」度拎咗包糖出嚟食，
真係連化妝時間都唔放過食嘢。

    期後佢就上底妝，再用「摩打手」係咁用掃上碎粉，掃掃下仲突然話隻手好攰，
仲同隔離隻熊公仔講：「要變靚唔係咁易O架。」之後就再畫眉同痴假睫毛，唔知係唔係化妝太用氣，
李國珠之後就將成包糖倒晒入口。最後戴埋個假髮，完成！

    節目組之後就好抵死咁整咗李國珠化妝前同化妝後對比樣。
化完之後靚唔靚就見仁見智囉。
不過成班男星睇完之後都笑到拍晒手，康男仲企埋起身拍手添。